GANDONG E

Oleh Eko Saputra Poceratu

–

Gandong e mari beta polo ale sadiki
waktu sasaja biking katong tacigi
peci su tutup mata sampe kaki
mar jang lupa mata aer di parigi

mari jua gandong katong pulang ka rumah
basombar di bawah atap daong sagu
katong manyanyi kapata-kapata lama
petik aer mata jadi nada dalam lagu

mari jua gandong katong pulang ka rumah
basandar di tiang marga kayu besi
lia sejarah yang bertahan paleng lama
seng ada yang berubah, cinta tetap hahesi

mari jua katong pulang ka dinding gaba-gaba
laeng tau laeng pung lombo deng kuat
dendam biking buta mar cinta masih bisa raba
balajar dari salah lalu eso jang berbuat

mari jua katong pulang ka meja makang
ambel tampa garam, rasa asin luka, rasa akang
satu pung isi hati bisa biking yang laeng tamakang
deng satu pung susah, yang laeng siap tongka balakang

mari katong pulang, maso poris sampe dapor
sejarah seng bisa ulang, mar carita jang sabarang ator
tau mana batas kintal, tau kapan kasmanyala obor
lia darah merah kantal, jang tiop abu par biking kotor

mar gandong e mangapa manis di tobu jadi ampas lenggua
sagu salempeng patah dua, ale su lupa akang jua
ale rasa beta rasa, rasa apa kalo taruh dendam
potong di kuku rasa di daging, rasa apa kalo cuma diam

gara-gara uang, skarang sodara bisa jual sodara
gara-gara politik, skarang sodara manyangkal sodara
gara-gara rumah, skarang sodara bisa tikam sodara
gara-gara tanah, skarang sodara bisa bunuh sodara

piring jua bisa tatoki picah di meja makang
piring-piring skarang su picah lalu sapa ganti akang
kalau ada masalah langsung selesaikan sampe akar
karna tunas seng bisa tumbuh kalo racong yang bawa akar

cinta macam apa yang lempar bunga api dalam mata rumah
cinta macam apa yang siram aer mata di atas luka-luka
cinta macam apa yang kastumpah darah di atas tanah mama
cinta macam apa yang kasbiar sodara gugur ponoh duka
cinta macam apa yang kasbiar ana-ana manangis dalam hutan
cinta macam apa yang kasbiar orang tatua lari deng ketakutan
cinta macam apa yang kaslari peluru deng kebencian
cinta macam apa yang sampe hati kasi mati ikatan perasaan

angka janji, angka sumpah, inga samua jang lupa
tanah ini ada par ada par kasi subur persaudaraan
makang satu meja, manangis satu rumah, inga beta sapa
jang tutup mata jang tutup hati, jang buka talinga par setan

karna bukang sakali katong bakalae,
katong paleng tau cara baku bae
kalo katong salah pasti dapa pukul dari mama
artinya salah tetap salah, dapa pukul supaya lebe bae

lia bakas luka itu gandong
pahit deng manis katong tetap sama

Ambon, 2022.